Чэмпіянат краіны. Першая ліга.
4 ліпеня 2009 г.
г. Гомель, стадыён ВА "Гомсельмаш" - 348 гледачоў, уваход вольны.
Воблачна, тэмпература паветра +21

ДСК-Гомель - "Верас" (Нясьвіж) - 1:4
Голы: Ткач (74 хв.); Сяргей Шаліма (7 хв.), Зьміцер Гаўрыловіч (52 хв.), Сяргей Равіна (80 хв., 83 хв.)


Перадусім
Мінулы раз я спытаўся: "ДСК-Гомель не спыніць?" Адказ на сваё пытаньне атрымаў у суботу. Высьвятлілася, на жаль, што ДСК-Гомель можна спыніць. Гомельскія футбалісты зрабілі вельмі балючы і вымушаны "нясьвіжскі прыпынак". ФК "Верас" з былой некаранаванай сталіцы нашай краіны проста ўшчэнт разьбіў ДСК-Гомель - 1:4!. Дагэтуль гомельскі клюб у адзінаццаці сустрэчах прапусьціў у сваю браму толькі 6 галоў, а тут за 90 хвілінаў гульні - чатыры!

( Read more... )

Tags: Гомель, Футбол, Чэмпіянат краіны

Апошнім часам лукашысты распачалі інфармацыйную кампанію пра неабходнасьць забароны ўжываньня піва (ды іншых алкагольных напояў) у грамадзскіх мейсцах. Яны спасылаюцца на эўрапейскі досьвед і кажуць, што так будзе "культурна".
Асабіста ў мяне вялікія сумневы адносна разумнасьці згаданых карных мераў. І я сумняваюся, што ў Добрушы пасьля ўхалы забароны пачнуць піць "культурна". У нас і так, кавярні - гэта найкрымінагенейшыя мейсцы ў горадзе. Гэта падцьвердзіў, дарэчы, начальнік Добрушскага РАУСа ў сваім выступе на сэсіі Добрушскага раённага Савету дэпутатаў. Сярод іншага ён адзначыў, што "кавярні "Арфей", "Сустрэча", "Фартуна", "Эдэм", Бар-Більярд (а гэта амаль увесь пералік добрушскіх кавярняў- мая заўвага) зьяўляюцца лідарамі па зьдзяйсьненьню дробнага хуліганства". Па асабістых назіраньнях хачу адзначыць, што частка тых дробных хуліганстваў насамрэч - крымінальныя хуліганствы. Бо як яшчэ вызначыць бойкі ў кавярні, калі лётаюць і сталы, і стулы...

Tags: Добруш, Добрушскія навіны, Дурноты грамадзскага жыцьця

Гомельскі абласны драматычны тэатр 12 ліпеня запрашае на крымінальную меладраму айчыннага аўтара Аляксея Дударава "Рыва".

Tags: Гомель, Культура, Тэатр

Учора, 29 чэрвеня, у Гомлі быў зафіксаваны сёлетні тэмпературны максімум +31!

Tags: Гомель, Надвор'е

На мінулых выходных гомельскі клюб у чарговы раз здабыў перамогу ў Менску над ФК "СКВІЧ" - 3:0. Гэта ўжо пятая перамога гамяльчанаў запар! Пры чым сухая! З агульным вынікам 8-0! І што асабліва ўсьцешыла - гэта тэндэнцыя да павелічэньня выніковасьці: 0-1, 0-2 і нарэшце 0-3! У выніку хоць клюб застаўся на ранейшым чацьвертым мейсцы, за тое скараціў сваё адставаньне ад другога мейсца (як прынамсі і ад трэцьцяга) да 1 балу! У бліжэйшую суботу (4 ліпеня) ДСК-Гомель на сваім полі сустрэніцца зь нясьвіжскім "Верас". Калі гамяльчане перамогуць - яны выйдуць мінімум на 3-цяе мейсца ў першынстве. Цікавае і прынцыповае дэрбі чакае нас.

Tags: Гомель, Футбол, Чэмпіянат краіны

Рашэннем Гомельскага гарадскога выканаўчага камітэта, рашэннем ад 4 чэрвеня 2009 г. № 624, пастаўлена на ўлік Гомельская гарадская арганізацыя ТБМ. Сакратарыят выказвае вялікую падзяку старшыні абласной Гомельскай арганізацыі ТБМ беларускаму пісьменніку Анатолю Бароўскаму за руплівую працу па аднаўленні афіцыйнага статуса Гомельскай гарадской арганізацыі.
Заклікаем усіх жыхароў г. Гомеля, неабыякавых да лёсу роднай беларускай мовы, далучацца да дзейнасці гарадской арганізацыі ТБМ. Старшыня ТБМ, Алег Трусаў
Крыніца інфармацыі: http://tbm.org.by/index.php?option=com_content&task=view&id=136&Itemid=1

Tags: Беларусь, Гомель, Палітыка

Два мінулых дні адзначыліся 30-ці градуснай сьпякотай. І сёньня, па ўсім відаць, будзем мець тую-самую лічбу. Пакуль +26, але на небе ні хмурынкі...

Tags: Гомель, Надвор'е

Чэмпіянат краіны. Першая ліга.
21 чэрвеня 2009 г.
г. Гомель, стадыён ВА "Гомсельмаш" - 329 гледачоў, уваход вольны.
Воблачна, тэмпература паветра +22

ДСК-Гомель - "Спартак" (Шклоў) - 2:0
Голы: Мікалай Хомчанка (59 хв.), №14 (90 хв.)

Перадусім
Мінулы свой матар'ял-рэпартаж з гульні ДСК-Гомель я назваў "Папёрла?!" Гэты выраз зараз можна ўжо казаць сьцьвярджальна, таму што ўчатырох гульнях запар гомельскі футбольны клюб выйграе. Першай іхняй ахвярай была мазырская "Славия", потым гарадзенскі "Белкард", сьледам ФК Баранавічы і нарэшце шклоўскі "Спартак". Калі першым пашансавала прайграць зь лікам 1:0, дык шклоўцы спазналі горшае. Іх ДСК-Гомель пабіў мацней - 2:0, так бы мовіць гамяльчане "посьпех падвоілі" - забілі ўдвая болей за папярэднія свае вынікі.
І сінія форма для гамяльчанаў зрабілася "фартовай". Пакуль, што яна прыносіць выключна перамогі:)

( Read more... )

Tags: Гомель, Футбол, Чэмпіянат краіны

Мой найулюблёнейшы піўны брэнд - рэчыцкі "Berg". Цёмны гатунак найсмачнейшага піва маёй краіны сёлетняй вясной пачаў зьнікаць з паліцаў добрушскіх крамаў. Гэта мяне занепакоіла. Аднога разу ва ўсім горадзе не было аніводнай бутэлькі гэтага файнага напою!!! Жах! А на днях пабачыў, што ў крамах ля фарфоравага заводу ізноў зьявіўся "Berg" розных гатункаў: Porter, Classic ды Lager. Трэба зладзіць самадзейны піўны фэст зь сябрамі з гэтай нагоды.
"Berg" forever! "Berg" назаўсёды!
p.s. трэба дадаць "Berg" і ў сьпіс сваіх зацікаўленьняў.

Tags: Добруш, Разгуляюсь па кабетах, Спажывецкі кошык

У нядзелю, 21 чэрвеня, выпадкова пераключыў свой тэлівізар на СТБ і пабачыў выступ рок-гурта "Крамы" у тэлеперадачы "Песьні роднай зямлі". Варашкевіч сьпяваў "Усё жыцьцё - дзіўны сон..." Для мяне гэта было прыемнай неспадзяванкай. Шкада толькі, што ніхто не папярэдзіў пра магчымасьць пабачыць "Краму" на айчынным тэлебачаньні.
Шаноўныя віртуальныя сябры, калі ласка, калі будзе Вам штосьці вядома пра паказ па тэлебачаньні нашых слынных рок-гуртоў пакідайце мне паведамленьні з гэтай нагоды. Загадзя Вам дзякуй.

Tags: tv, Беларусь, Культура, Музыка