liashkou_a

Спатыкнуліся?

2009-11-27T05:21:14Z

21 лістапада наша "Іпуць-ДЮСШ" згуляла гасьцявую гульню супраць аўтсайдэра "Кіраўск-ДЮСШ" і прайграла - 4:9. Пасьля пяці тураў дабрушане на чацьвертым мейсцы ў кампаніі трох клюбаў, якія займаюць 3-5 мейсца з аднолькавай колькасьцю балаў - 9.
Да фінішу першага кола сёлетняга першынства засталося тры матчы. "Іпуць" чакае цяжкае выпрабаваньне - рэшту гульняў яна мусіць згуляць з лідарамі: 29 лістапада з барысаўскай "Бярэзінай" (2-ое мейсца), 5 сьнежня з салігорскім "Гарняком" (1-ае мейсца) і 25 сьнежня з ФК "Рэчыца" (3-яе мейсца). Відавочна, што гэтыя гульні будуць вырашальнымі і дазволяць пабачыць сапраўдную моц нашага клюбу.

Балканская перамога

2009-11-27T05:18:13Z

Гульні плэй-оф за пуцёўку на першынство сьвету-2010 скончыліся перамогаю балканскіх краінаў. Грэцыя перамагла Ўкраіну - 0:0, 1:0. А Славенія Расею - 1:2, 1:0. Расея і Ўкраіна ня трапілі на чарговы чэмпіянат сьвету па футболе.

Грып A (H1N1)?

2009-11-16T11:50:38Z

У мінулую сераду захварэў. Тэмпература за 39... На ўласным досьведзе пераканаўся, што ў добрушскіх і гомельскіх аптэках па-ранейшаму дэфіцыт лекаў. Прынамсі, якія дэфіцыт? Іх проста няма! Лекары працуюць на аўтамаце. Іх можна зразумець - столькі працы.
Каб не мая любая, я б напэўна памёр. А так аптымістычна можна сьцьвярджаць словамі рок-гурта "Крамы":
Я дзякуй богу:)
Пакуль ня здох...
Спадзяюся, што выкараскаюся найбліжэйшым часам. Тым больш, што ўжо назіраецца паляпшэньне.
p.s. дарэчы разумею чаму ў нас нешмат захварэўшых на грып A (H1N1). Бо так як мяне прымаў лекар (як прынамсі і іншых пакутваючых пацыэнтаў), на маю думку, паставіць дыягназ "сьвінны грып" проста немагчыма...

Кшыштаф Занусьсі ў Гомлі?

2009-11-16T11:49:57Z

Сёньня, 16 лістапада, а 17-ай гадзіне ў гомельскім кінатэатры імя Калініна ў межах кінафэсту "Лістапад" творчая сустрэча з слынным рэжэсэрам Кшыштафам Занусьсі (калі даць веры рэкляме). Уваход вольны. Пасьля сустрэчы адбудзецца прагляд стужкі-пераможцы Венецыянскага кінафэсту "Год спакойнага сонца". А 17 і 18 лістапада ў 18-30 кінатэатр "Кастрычнік", што на вуліцы Барыкіна, запрашае на яшчэ дзьве драматычныя стужкі згаданага майстра кіно - "Абарончыя колеры" ды "Сямейнае жыцьцё".
Не прамініце цікавыя стужкі і надзвычай рэдкую магчымасьць пабачыць кінарэжэсэра сусьветнага ўзроўню ў Гомлі.
Шкада толькі, што я не трапляю:( Хвароба! Халера яе бяры!

Прынцыповая перамога

2009-11-16T11:49:13Z

14 лістапада наша "Іпуць-ДЮСШ" у родных сьценах узяла перамогу над магілёўскай "Спартляндыяй" - 9:8. Матч меў прынцыповы характар для абедзьвух клюбаў. Яны знаходзіліся побач у турнірнай табліцы. Перамога дазваляла ўмацаваць сваё становішча. З гэтай прычыны на пляцоўцы трывала напружаная і зацятая барацьба. Доўгі час госьці вялі ў ліку і толькі напрыкацы сустрэчы гаспадары здолелі выдрапаць такую патрэбную перамогу. Зараз наш футбольны клюб займае трэцьці радок у табліцы.
Праз хваробу быў вымушаны прапусьціць гульню:(

Улада зьмяняецца?

2009-11-16T11:47:27Z

Кубкавы двубой "ДСК-Гомлі" і ФК "Гомель", за якім давялося сачыць праз мабільны тэлефон ды інтэрнэт, скончыўся перамогай "будаўнікоў" - 4:3. Нявыключана, што гэта першая дзея футбольнай драмы па зьмене лідара гомельскага футболу. Барацьбу за Кубак краіны працягне наступнай вясной менавіта "будаўнічы" клюб, а ягоны спарынг-партнёр ФК "Гомель" завершыў, няхай спадзяюцца ягоныя аматары, свой найкатастрафічнейшы сэзон у гісторыі.
Чакаем новы 2010 год і заўзее за "будаўнікоў". "ДСК-Гомель", наперад!

12 лістапада - прэм'ера канца сьвету!

2009-11-10T11:14:20Z

Ад 12-га лістапада ў гомельскім кінатэатры імя Калініна будзе дэманстравацца апакаліптычная стужка Рональда Эмірыха (Ronald Emmerich) "2012".
Пабачыць галівудзскае ўвасабленьне прарочага каляндара цывілізацыі майя можна будзе ў 14-30, 17-30 і 20-30. 16 і 18 лістапада толькі адзін сэанс у 20-30.

Зімовы футбол

2009-11-10T11:13:41Z

Чэмпіянат краіны. Першая ліга.
31 кастрычніка 2009 г.
г. Гомель, стадыён "Гомсельмаш" - 115 гледачоў, уваход вольны.
Хмарна, тэмпература паветра +2

ДСК-Гомель - "Хімік" (Сьветлагорск) - 3:0
Галы: Дабраўлянскі (88хв., 90+5 хв.)

Праца vs Футболу
"Абедзенны" футбол у мяне заўжды прайграе працы:( З гэтай прычыны атрымалася завітаць на стадыён толькі на другі тайм.

Першы тайм
Якім ён быў мне невядома, але лік быў на карысьць "ДСК-Гомель" - 1:0.

Першы сьнег
Зь першым сьвістком другога тайму па-над гомсельмашаўскім стадыёнам закружыўся першы, хоць і вельмі слабы, сьнег.

Залатое ўбраньне
За тое зялёны дыван поля апрануўся ў шыкоўны ды авангардысцкі залаты строй з жоўтага лісьця.

Фаны "Хіміка" дапамаглі
На мінулым матчы "ДСК-Гомель" прысутнічала 67 гледачоў. Гэтым разам колькасьць гомельскіх аматараў футболу была не нашмат большай. На трыбунах сьпявалі-крычалі 32 сьветлагорскіх фанаты. Такім чынам, гамяльчанаў было толькі 83 - гэта значыць меньш за сотню.

Трапная замена
У другой палове другога тайму на поле ў складзе гаспадароў выйшаў Дабраўлянскі (№14), якому было наканавана зрабіцца героям сустрэчы. На ягоным рахунку два з трох забітых мячоў!

Хроніка небясьпекі.
73-ая хвіліна. Памылка сьветлагорцаў у цэнтры поля, падбор мяча гамяльчанамі - пас на левы фланг. Марозаў (№10) прайшоў да штрафной пляцоўкі, увайшоў у яе, наблізіўся да брамніцкай і прастрэліў уздоўж брамы. Брамнік "Хіміка" мяч перахапіў, а на далёкай штанзе яго чакаў партнёр Марозава.
79-ая хвіліна. Атака "ДСК-Гомлі" левым флангам. Навес на далёкую штангу. Першым на мячы Дашук (ДСК-Гомель, №20). Ён б'е галавой, але кепска і слаба. Аднак атрымоўваецца парашут, які ледзьве не залятае за каўнер сьветлагорскаму брамніку.
88-ая хвіліна. Хуткая атака гамяльчанаў. З правага флангу пас у цэнтр да штрафной пляцоўкі, адтуль пас на правы кут штрафной. Даўбраўлянскі б'е у левы кут - 2:0!
90+4-ая хвіліна. Памылка гульцоў "Хіміка" ля цэнтра поля. Перспектыўная атака "ДСК-Гомлі". Мяч у Марозава зправа і зьлева партнёры. Ён вырашае прабіць здалёк. Удар нізам у правы кут. Брамнік на мейсцы - мяч адбівае.
90+5-ая хвіліна. Чарговая атака гамяльчанаў. Пас у цэнтр на Дабраўлянскага (№14). Ягоны стрэл метраў з 25-ці ў правы ніжні кут дадае яшчэ адзін гол гомельскаму клюбу - 3:0.

Першалігаўскі двубой

2009-11-09T20:42:56Z

Ну, вось нарэшце і ўсё - ФК "Гомель" таксама як і "ДСК-Гомель" фінішаваў трэцьцім. Толькі "ДСК-Гомель" спыніўся на трэцьцім радку Першай лігі, а ФК "Гомель" на трэцьцяй прыступцы сярод аўтсайдэраў Вышэйшай лігі. Такім чынам, абодва гомельскіх клюба ў наступным годзе будуць спаборнічаць у Першай лізе. Каму пашанцуе болей даведамся праз год. А пакуль надарылася магчымасьць зрабіць першую прымерку.
11 лістапада а 18-ай гадзіне на стадыёне "Цэнтральным" матч 1/8 фіналу Кубка краіны - ФК "Гомель" - "ДСК-Гомель", а на выходных 15 лістапада а 13-ай гадзіне адбудзецца паўторны матч. Пабачым хто каго?

Карантын у Добрушы

2009-11-09T20:41:34Z

Ад панядзелка ў добрушскіх школах карантын праз эпідэмію грыпу. На мінулым тыдні ў добрушскіх аптэках назіраўся ажыятаж і дэфіцыт лекаў.

Выходныя на канапе

2009-11-07T15:43:09Z

У суботу, 7 лістапада:
СТБ
20-10 "Зорны рынг" Піт Паўлаў&"Garadzkija" супраць Ані Шаркуновай
21-35 прыгодніцкая кінастужка "Ілюзіяніст"

Нядзеля, 8 лістапада
Лад
19-15 Футбол. Англійская Прэм'ер-ліга

Піт Паўлаў&"Garadzkija на СТБ

2009-11-07T15:42:14Z

Сёньня, сябры, 7 лістапада ў 20-10 на тэлеканале "Сталічнае тэлебачаньне" ў перадачы "Зорны рынг" Піт Паўлаў&"Garadzkija. Глядзім, заўзеем, галасуем за "Гарадзскіх".

БАТЭ-АЕК

2009-11-05T10:37:36Z

Сёньня, 5 лістапада а 22-ай гадзіне на тэлеканале "Лад" трансляцыя матчу Лігі Эўропы - барысаўскі "БАТЭ" супраць афінскага "АЕКу". Глядзім, заўзеем!

Apple Tea ў Гомлі

2009-11-05T10:36:59Z

28 лістапада а 17-ай гадзіне ў ГКЦ, які месьціцца на вуліцы Ланге, 17, адбудзецца канцэрт гурта Apple Tea у межах агульнанацыянальнага туру. Імпрэза прысьвечана 110-ым угодкам з дня нараджэньня Дзюка Элінгтана. Кошт квіткоў: 15-25 тысячаў рублёў.
Тэлефоны для даведак: 71-10-21, 73-02-00

Сход акцыянераў

2009-11-05T10:36:05Z

Заўтра, 6 лістапада а 12-ай гадзіне адбудзецца лёсавырашальны сход акцыянераў ААТ Добрушскай папяровай фабрыкі "Герой працы", якая знаходзіцца ў крызісным фінансава-эканамічным становішчы. На сходзе плянуецца разгледзіць тэрміновыя пытаньні і ухваліць рашэньні аб рэарганізацыі ААТ шляхам далучэньня да менскага ААТ "Беларускія шпалеры".Працоўныя паперні нічога станоўчага ад гэтага аб'яднаньня не чакаюць.

Чарговая перамога

2009-11-05T10:34:07Z

1 лістапада наш клюб "Іпуць-ДЮСШ" здабыў гасьцявую перамогу над сьветлагорскім "ДЮСШ-ЦКК" зь лікам 9:3. Галы забівалі: Жарыкаў - 4, Шчупачэнка - 2, Пабядзінскі - 2 і Ўсік. Пасьля трох гульняў добрушская "Іпуць-ДЮСШ" знаходзіцца на трэцьцім мейсцы з 6-цю баламі. Яна саступае тры балы барысаўскай "Бярэзіне" і шэсьць балаў салігорскаму "Гарняку" (якія правялі на адну гульню больш).
Наступнага разу 14 лістапада у "Іпуці-ДЮСШ" прынцыповы матч з магілёўскай "Спартляндыяй", якая атабарылася на чацьвертым радку ў табліцы.

Бранскае "Дынама" застаецца ў Другой лізе

2009-10-30T08:14:14Z

28 кастрычніка "дынамаўцы згулялі сваю апошнюю сустрэчу сёлетняга чэмпіянату Расеі ў Другой лізе ў гурце "Цэнтр". Дома яны выдрапалі перамогу зь лікам 1:0 у "чыгуначнікаў" зь Лісак. У выніку чаго ўзьняліся на другое мейсца апярэдзіў падольскі "Авангард", які саступіў з такім самым лікам "Русічам" з Арлу.
Аднак першы радок і пуцёўка ў Першую лігу дасталася курскаму "Авангарду". Заўзятарам бранскага клюбу давядзецца пачакаць яшчэ год...

Прэзэнтацыя кнігі Алега Трусава

2009-10-30T08:13:09Z

Сёньня, 30 кастрычніка адбудзецца прэзэнтацыя кнігі Алега Трусава «Невядомая нам краіна» ў Гістарычнай майстэрні (Менск, вул. Сухая, 25, станцыя мэтро «Фрунзенская»).
Пачатак а 19-ай гадзіне

Крыніца інфармацыі: http://www.nn.by/index.php?c=ar&i=31035

Футбол у Гомлі

2009-10-30T08:12:33Z

На выходных у Гомлі адбудуцца гульні чэмпіянату краіны ў Вышэйшай і Першай лігах. У суботу на стадыёне "Гомсельмаш" дэмбельскі акорд у сёлетнім першынстве адыграе "ДСК-Гомель" супраць сьветлагорскага "Хіміка". Пачатак сустрэчы а 14-ай гадзіне. Уваход вольны. Акопы на ўваходзе гасьцінна зараўнялі. Прыходзьце, падтрымай "будаўнікоў".
У нядзелю на стадыёне "Цэнтральным" ФК Гомель гуляе прынцыповы і шматвырашальны матч з менскім "Дынама". Пачатак а 14-ай гадзіне. Квіткі можна набыць у касах. Ці ўтрымаецца ФК Гомель у нацыянальнай футбольнай эліце?

Выходныя на канапе

2009-10-30T08:11:56Z

Сіноптыкі абяцаюць на выходных халоднае надвор'е. Камусьці гэта добрая нагода застацца ў хаце і пасядзець ля блакітнага тэлеэкрана. На жаль, айчынныя тэлеканалы не падрыхтаваліся як сьлед да падобнага разьвіцьця падзеяў:( І тым неменьш, ёсьць магчымасьць паглядзець:

Сёньня, 30 кастрычніка:
СТБ
23-00 навіны шоў-індустрыі "Відзьма-нявідзьмо" зь Сяргеем Філімонавым

РТР-Беларусь
22-35 фантастычны трымценьнік "Выспа" з Эванам Макгрэгарам і Скарлэт Ёхансан у галоўных ролях.

У суботу, 31 кастрычніка:
СТБ
16-40 паўтор навінаў шоў-індустрыі "Відзьма-нявідзьмо" зь Сяргеем Філімонавым
20-10 "Зорны рынг" Песьняры супраць Drum Ecstasy

РТР-Беларусь
11-55 фантастычны трымценьнік "Выспа" з Эванам Макгрэгарам і Скарлэт Ёхансан у галоўных ролях.

Лад
14-40 Футбол. Англійская Прэм'ер-ліга: Арсэнал-Тотэнхэм
(Праўда, мне не давядзецца паглядзець, бо пайду на апошні матч сёлетняга сэзону "ДСК-Гомель" супраць сьветлагорскага "Хіміка")

Юры Жаўноў - найлепшы абаронца:)

2009-10-30T08:11:06Z

У мінулыя выходныя адбыўся 26-ы тур чэмпіянату Расеі па футболе сярод клюбаў Прэм'ер-лігі. ФК Масква, за які гуляе дабрушанін Юры Жаўноў сустракаўся з маскоўскім ЦСКА. "Месьцічы", якіх іх мянуюць расейскія журналісты, упэўнена перамаглі "армейцаў" 3:1. Гэтая перамога дазволіла клюбу ўзьняцца на чацьверты радок табліцы.
Пры гэтым, у Жаўнова было няшмат брамніцкай працы. Чаго варта ўзгадка пра першы "армейскі" ўдар у браму на апошняй хвіліне першага тайму. За тое, Жаўноў 6-7 разоў выдатна згуляў у якасьці абаронцы-лібэра. Ён сваімі сваечасовымі выхадамі па-за межы штрафной пляцоўкі спыняў небясьпечнае разгортваньне атак ЦСКА. Праўда, калі "армейцы" забілі гол, ён ня зьдзейсьніў аніякага цуду. Але там была памылка абаронцаў ФК Масквы.

Валявая перамога

2009-10-26T21:54:09Z

Чэмпіянат краіны па міні-футболу. Першая ліга.
24 кастрычніка 2009 г.
Спартовы комплекс ААТ Добрушская паперні "Герой працы" - 64 гледачы.

"ІПУЦЬ-ДЮСШ" (ДОБРУШ) - "ГОМЕЛЬШКЛО" (г.п. КАСЬЦЮКОЎКА) - 6:2 (3:2)
Галы: Усік (16), Пабядзінскі (31, 33), Жарыкаў (59, 80), Камзолаў (71) - "ІПУЦЬ-ДЮСШ"; Крайнюкоў (9, 24) - "ГОМЕЛЬШКЛО"

Гісторыя сустрэчаў.
Ужо другі сэзон запар клюбы сустракаюцца ў гурце "Б" Першай лігі. У мінулым першынстве "ІПУЦЬ-ДЮСШ" (ДОБРУШ) перамагла дома - 6:5, а касьцюкоўскае "ГОМЕЛЬШКЛО" на сваёй пляцоўцы - 5:3. Такім чынам, у іхнім супрацьстаяньні ўтварылася раўнавага - па адной перамозе. У выніковай табліцы клюбы знаходзіліся па-суседзству. "ІПУЦЬ-ДЮСШ" (ДОБРУШ) заняло 6-ае мейсца з 19-цю баламі, а "ГОМЕЛЬШКЛО" 7-ае з 18-цю баламі. Найлепшыя бамбардзіры абодвух клюбаў - Пабядзінскі і Шапавалаў забілі па 19-ць галоў.

Адзіная афіша.
На жаль, ва ўсім горадзе была толькі адна афіша, якая паведамляла пра гульню "ІПУЦІ-ДЮСШ" (ДОБРУШ) і "ГОМЕЛЬШКЛА". Яна знаходзілася на ўваходзе ў спартовы комплекс ААТ Добрушская паперні. І тая зьявілася недзе па абедзе ў пятніцу, 23 кастрычніка.

Больш падрабязна пра ўражаньні ад гульні напішу ў бліжэйшы час.

Сьмерць пад коламі цягніка

2009-10-26T21:53:16Z

14 кастрычніка на станцыі Добруш здарылася трагедыя. На пешаходным пераходзе грузавы цягнік Гомель-Бранск зачапіў 19-цігадовую дабрушанку, якая ў выніку загінула на мейсцы. Дзяўчына тым вечарам была разам з маці ў Гомлі і вярнулася прыгарадным цягніком за некалькі хвілінаў да здарэньня. Пры спробе перайсьці праз чыгунку яны і апынуліся на небясьпечнай адлегласьці ад праходзіўшага на вялікай хуткасьці ў бок Расеі лакаматыву. Шкада дзяўчыны...
На выходных зазірнуў на сайт Міністэрства ўнутраных спраў і даведаўся, што 14 кастрычніка ў Беларусі адбылося чатыры падобных здарэньні! Два зь якіх са сьмяротным вынікам. Падрабязна чытаць тут: Пресс-релиз УВД на транспорте 2009-10-16 - http://mvd.gov.by/modules.php?name=News&file=article&sid=6470

Одры Тату і Коко Шанэль

2009-10-26T15:02:13Z

Аматарам біяграфічных стужак раю наведацца ў кінатэатр "Юбілейны", дзе дэманструецца з 26 кастрычніка да 3 лістапада фільм "Коко Шанэль" з Одры Тату ў галоўнай ролі. Сэансы: 17-20, 19-10, 21-00. Хацелася б паглядзець, мо атрымаецца.

Вале - чэмпіён!!!

2009-10-26T15:01:11Z

Валентына Росьсі (Valentino Rossi) ўчора здабыў у дзявяты раз чэмпіёнскі тытул! Я рады ягонай перамозе. Віншую ўсіх заўзятараў найлепшага пілёта MotoGP. Гэта трэба адсьвяткаваць:)