Заўтра, 6 лістапада а 12-ай гадзіне адбудзецца лёсавырашальны сход акцыянераў ААТ Добрушскай папяровай фабрыкі "Герой працы", якая знаходзіцца ў крызісным фінансава-эканамічным становішчы. На сходзе плянуецца разгледзіць тэрміновыя пытаньні і ухваліць рашэньні аб рэарганізацыі ААТ шляхам далучэньня да менскага ААТ "Беларускія шпалеры".Працоўныя паперні нічога станоўчага ад гэтага аб'яднаньня не чакаюць.

Tags: Добруш, Добрушскія навіны, Эканоміка

1 лістапада наш клюб "Іпуць-ДЮСШ" здабыў гасьцявую перамогу над сьветлагорскім "ДЮСШ-ЦКК" зь лікам 9:3. Галы забівалі: Жарыкаў - 4, Шчупачэнка - 2, Пабядзінскі - 2 і Ўсік. Пасьля трох гульняў добрушская "Іпуць-ДЮСШ" знаходзіцца на трэцьцім мейсцы з 6-цю баламі. Яна саступае тры балы барысаўскай "Бярэзіне" і шэсьць балаў салігорскаму "Гарняку" (якія правялі на адну гульню больш).
Наступнага разу 14 лістапада у "Іпуці-ДЮСШ" прынцыповы матч з магілёўскай "Спартляндыяй", якая атабарылася на чацьвертым радку ў табліцы.

Tags: Добруш, Добрушскія навіны, ФК Іпуць, Футбол, Чэмпіянат краіны

Чэмпіянат краіны па міні-футболу. Першая ліга.
24 кастрычніка 2009 г.
Спартовы комплекс ААТ Добрушская паперні "Герой працы" - 64 гледачы.

"ІПУЦЬ-ДЮСШ" (ДОБРУШ) - "ГОМЕЛЬШКЛО" (г.п. КАСЬЦЮКОЎКА) - 6:2 (3:2)
Галы: Усік (16), Пабядзінскі (31, 33), Жарыкаў (59, 80), Камзолаў (71) - "ІПУЦЬ-ДЮСШ"; Крайнюкоў (9, 24) - "ГОМЕЛЬШКЛО"

Гісторыя сустрэчаў.
Ужо другі сэзон запар клюбы сустракаюцца ў гурце "Б" Першай лігі. У мінулым першынстве "ІПУЦЬ-ДЮСШ" (ДОБРУШ) перамагла дома - 6:5, а касьцюкоўскае "ГОМЕЛЬШКЛО" на сваёй пляцоўцы - 5:3. Такім чынам, у іхнім супрацьстаяньні ўтварылася раўнавага - па адной перамозе. У выніковай табліцы клюбы знаходзіліся па-суседзству. "ІПУЦЬ-ДЮСШ" (ДОБРУШ) заняло 6-ае мейсца з 19-цю баламі, а "ГОМЕЛЬШКЛО" 7-ае з 18-цю баламі. Найлепшыя бамбардзіры абодвух клюбаў - Пабядзінскі і Шапавалаў забілі па 19-ць галоў.

Адзіная афіша.
На жаль, ва ўсім горадзе была толькі адна афіша, якая паведамляла пра гульню "ІПУЦІ-ДЮСШ" (ДОБРУШ) і "ГОМЕЛЬШКЛА". Яна знаходзілася на ўваходзе ў спартовы комплекс ААТ Добрушская паперні. І тая зьявілася недзе па абедзе ў пятніцу, 23 кастрычніка.

Больш падрабязна пра ўражаньні ад гульні напішу ў бліжэйшы час.

Tags: Добруш, Добрушскія навіны, ФК Іпуць, Футбол, Чэмпіянат краіны

Сябры ды знаёмыя паведамляюць з розных куткоў нашай краіны пра мокры сьнег ды халадэчу. Гляджу тэлевізар - сьнег у Польшчы і Заходняй Украіне. І толькі на паўднёвым усходзе - у Добрушы цеплыня. Раніцой і ўдзень у нас было +16! Апоўдні нават сонейка выглянула з-за хмараў - зрабілася зусім па-летняму. Зараз з надыходам прыцемак тэіпература ўпала, але ўсяроўна +7.

Tags: Добруш, Надвор'е

Сёньня ўначы ў нас была навальніца - грымела ды бліскала. Вось такая запозьненная, восеньская, кастрычніцкая навальніца здарылася.

Tags: Добруш, Надвор'е

КУПЛЯЙЦЕ СШЫТКІ ДЫ БЛАКНОТЫ ДОБРУШСКАЙ ПАПЕРНІ "ГЕРОЙ ПРАЦЫ"!
Сябры, чытачы, шаноўнае спадарства вымушаны зьвярнуцца да вас з заклікам набываць сшыткі і блакноты Добрушскай папяровай фабрыкі "Герой працы". Ва ўмовах сусьветнага эканамічнага крызісу прадпрыемства нашага гораду апынулася ў вельмі цяжкім становішчы. А яно забясьпечвае працай больш за 1.000 чалавек, пры насельніцтве Добруша каля 19.000 жыхароў. Паперня адно з дзьвух горадаўтвараючых прадпрыемстваў. Амаль у кожнай добрушскай сям'і ёсьць сваякі, які працуюць альбо працавалі калісьці на слыннай папяровай фабрыцы. Яна мае доўгаю гісторыю. За часамі расейскай імпэрыі Добрушская папяровая фабрыка была адным з найбуйнейшых ды прагрэсіўных прадпрыемстваў Беларусі. За часамі савецкай Беларусі паперня атрымала ганаровае званьне "Герой працы". Можна ўзгадаць шмат яшчэ славутых яе старонак... Паперня - гэта сымбаль г. Добруша, гэта ягоная гісторыя і спадзяюся будучыня. Зараз Добрушская папяровая фабрыка патрабуе дапамогі і я заклікаю вас, згодна традыцыяў нашага народу, дапамагчы ёй талакою. Калі ў вас узьнікне патрэба набыць сшытак альбо блакнот не спакушайцеся расейскімі глямурнымі прынадамі, а купляйце простыя з выгляду вырабы Добрушскай папяровай фабрыкі "Герой працы".

Tags: Добруш, Увага

Эўропу пячэ, а ў нас прахалода. Амаль увесь жнівень тэмпература трымаецца +19+23. Ніводнага разу слупок тэрмомэтра не набліжаўся да +30. А звычайна такое бывае...

Tags: Добруш, Надвор'е

Учора захацелася сьмятаны. Пайшоў у краму, дзе набыў 10% сьмятану, якую вырабляе ААТ "Малочныя прадукты". У Гомлі яна каштуе - 1520 рублёў за 500 гр, а ў Добрушы - 1590 рублёў. Чарговы раз пераканаўся, што харчовыя прадукты ў Добрушы даражэйшыя чымся ў Гомлі.

Tags: Добруш, Кошты, Спажывецкі кошык

У нядзелю ў Добрушы захацелася набыць "Актывіл" альбо "Ідэал", тым самым падтрымаць айчынную малочную прамысловасьць. Дзеля гэтага выбраўся ў гарадзскія крамы. Але мяне чакала расчараваньня. Набыць "Актывіл" альбо "Ідэал" у Добрушы выявілася складанай задачай. Давялося наведацца ў 7-9 крамаў каб знайсьці вышукваемы прадукт. Ягоны кошт таксама непрыемна зьдзівіў. Калі ў Гомлі "Актывіл" можна набыць за 1.880 рублёў (і нават таньней), дык у Добрушы я яго прыдбаў за 2.200 рублёў. Розьніца 320 рублёў! А дабрушане маюць меньшыя за гамяльчанаў заробкі.

Tags: Добруш, Кошты, Спажывецкі кошык

1 жніўня, недзе ў 9-30 выбраўся з Гомлі ў Добруш. У Гомлі было ўжо хмарна і сыпаў дождж. Прыехаў у Добруш... а там зьзяе сонца. А гэта нейкіх 20 кілямэтраў, а калі лічыць адлегласьць ад Бярозак да Расьвету дык увогуле 12-14 кілямэтраў. Праўда ў 10-30 набеглі з небасхілу цёмныя хмары ды пасыпаў дождж і ў Добрушы. Вось так павольна рухаўся на ўсход атмасфэрны фронт, які я апярэдзіў:)

Tags: Гомель, Добруш, Надвор'е